«Россия» күргәзмә-форумы кысаларында «Россия суы» сессиясендә «Экология» илкүләм проектын тормышка ашыруда Татарстанның казанышларын һәм республика халкының активлыгын билгеләп үттеләр
8 февральдә, тематик экология көне кысаларында, ВДНХда Россия күргәзмә-форумында «Россия суы» сессиясе узды. Россия Табигать министрлыгының Су ресурслары өлкәсендә дәүләт сәясәте һәм җайга салу департаменты директоры Роман Минухин җитәкчелегендә тере дискуссия режимында төбәкләрнең министрлыклары җитәкчеләре һәм фәнни берләшмәләр вәкилләре «Экология» илкүләм проектын гамәлгә ашыруның казанышлары, нәтиҗәләре һәм тәҗрибәсе, шулай ук су объектларын саклау һәм савыктыру өлешендә комплекслы алым турында фикер алыштылар.
Татарстанның экология министры урынбасары Егор Тарнавский билгеләп үткәнчә, «Экология» илкүләм проекты кысаларындагы чараларны гамәлгә ашырганда республика кулланган комплекслы алым су объектлары янында халыкның тормыш сыйфатын яхшыртып, территорияләрне үстерүгә, төбәкнең инвестицион җәлеп итүчәнлеген һәм туристлар агымын арттырырга ярдәм итә.
Министр урынбасары семинарда катнашучылар белән фәнни карашлы проектларны гамәлгә ашыру буенча эш тәҗрибәсе белән уртаклашты. Аерым алганда, Иделгә эләгүче пычрак агынтыларның 42 проценты туры килгән балчык кырларын рекультивацияләү алдыннан, төбәк җитди фәнни-тикшеренү эшләре үткәргән. Эффектив эш ысулын эзләү өчен 280дән дә ким булмаган ләм ултырмасы һәм 218 туфрак үрнәге алынган, ә яхшырак чишелеш юлын эзләү өчен 36 методика сыналган. Россия Президенты Владимир Путин инициативасы белән оештырылган «Экология» илкүләм проекты иң глобаль бурычларны һәм проблемаларны хәл итәргә мөмкинлек бирә һәм илдә экологик үзгәртеп коруларны үстерүгә ярдәм итә. Илкүләм проектны гамәлгә ашыруның берничә елында республикада яшәүче 3 миллионнан артык кеше яхшы якка үзгәрешләр булуын сизде».
Роман Минухин да Татарстан казанышларын билгеләп үтте. Ул республика халкының активлыгын мисал итеп китерде: «Республиканың барлык халкы экология мәсьәләләренә җитди карый. Инде өченче ел рәттән Татарстан ярларны чүп-чардан чистарту буенча «Россия суы» Бөтенроссия волонтерлык акциясе рейтингында җиңүче булып тора. Биредә акциянең өмәләре 2023 елда 322 меңгә якын катнашучыны җыеп, алар 9 мең км яр буе полосасын чистарткан.
Чара фәнни җәмәгатьчелек вәкилләре катнашында узды. Россия фәне көнендә җир өсте суларын модельләштерү лабораториясе мөдире, РФА Су проблемалары институтының техник фәннәр докторы Михаил Болгов диффуз агымнар ягыннан тискәре йогынтыны киметү вариантлары турында сөйләде. Спикер яңгыр белән су объектларына кергән пычраткыч матдәнең күләмен исәпләүнең махсус ысулын тәкъдим итте, ул илнең мөһим су объектларына кагылышлы эшне планлаштырганда каралачак.
Сессиядә яңа төбәкләр вәкилләре дә катнашты. Мәсәлән, ДНР Су һәм балык хуҗалыгы дәүләт комитеты рәисе вазыйфаларын вакытлыча башкаручы Андрей Судьин билгеләп үткәнчә, Марковников үзәнлегенең су агымы торгызылган, шулай ук Кальмиус елгасын чистарту буенча эшләр башланган, алар 2024 елда да дәвам иттереләчәк.
Ахырда Роман Минухин, барлык тәҗрибә һәм практик киңәшләр киләчәк проектларда җентекләп өйрәнеләчәк һәм кулланылачак, дип ассызыклады.