Югары Ослан районында геологик разведка эшләрен үткәрү

2023 елның 12 гыйнвары, пәнҗешәмбе

«ТР Геология үзәге фәнни-җитештерү берләшмәсе» ДБУ дәүләт йөкләмәсе кысаларында геологик разведка эшләрен дәвам итә. Татарстан Экология һәм табигать ресурслары министрлыгы республиканың Югары Ослан районында яшәүчеләрне эчәргә яраклы сыйфатлы су белән тәэмин итү өчен эзләү-бәяләү эшләрен башкарырга кушты.

Хәзерге вакытта Нәриман торак пунктында 90 метр тирәнлеккә кадәр эзләү скважинасы борауланды, якын арада анда гидрогеологик скважинаның проект характеристикаларын раслау өчен тәҗрибә-фильтрлау эшләре башкарылачак, шулай ук алдагы лаборатор анализ өчен су пробалары алыначак. Башкарылган эшләр нәтиҗәләре буенча эчә торган җир асты сулары запасларын саклау өчен хисап әзерләнәчәк.